ديكتاتور باطني
الاحد 09 ابريل 2017 - الساعة 01:46 صباحاً
..........................
قبل اسبوع حسيت حالي تعبان وجسمي كله مقطقط ، عملت فحوصات بالمجان عند واحد صاحبي معه مختبر واخذت النتائج و قلت شاروح عند دكتور يشوف مالي . ومن حسن حظي ان الدكتور الباطني اللي رحت لاعنده طلع يعرفني ومسرع ما شخص حالتي حتى قبلما يشوف نتائج الفحوصات وتخطيط القلب اللي سملتهن له وشاف اسمي داخلهن و قلي :
- انت فكري قاسم ، الصحفي.
- ايوه يادكتور انا هوه .
رديت وانا فرحان ، وبكم هيه لما يعرفك الدكتور، يعني علاجك مضمون وعادنا ماكملتش افتخر بنفسي اننا مشهور الا وسمعته يقلي :
- لكن انت عفاشي ياخي .
- لا والله ..
- ألا ألا داخلك عفاشي كبير بس تغالط !
هكذا شخص حالتي فيسع حتى من دون مايشوف فحص الدم ! قد يطلع عندي ملاريا والا حزازة مثلا ومايكونش عفاشي .
اغلب الظن ان الطب الان قد تطور و ماعادوش هاضاك الطب حق زمان ، اللي كان الواحد يجلس يراعي لنتيجة الفحص ايام ، ما اليوم الا قطبه . ومدراكم الله ان الديكتاتور الباطني هذا يكون قد عمل لي أشعة محورية من اول مابديت عليه وطلع ان بيني عفاشي وانا شجلس اكارح وانكر واقوله يمكن حزازة في المعدة او شي من هذا القبيل .
و اما صاحبي المخبري فأنا زعلان منه قوي بصراحة .. عمل لي كل الفحوصات اللازمة وناولني اوراق النتيجة من دون حتى مايقلي ان عندي اعراض عفاشية ، يمكن عشان مايصدمنيش ، الله اعلم .
المهم روحت يومها مهموم بحالتي الصحية المتدهورة وانا مُخبي وخايف لايقرروا لي عملية وانا اكره العمليات ، وو صلت البيت هاذاك اليوم وامي قلقانة تسالني :
- هيا ماقلك الدكتور ؟
- مابوشي .. شوية عفاشي في المعدة .. بس عاده بأوله الحمد لله ويمكن نلحقه .
امي اطمنت مادام وهو الا شوية في المعدة وسألتني : مله وماقلك من ايش جالك ؟
مادريت ما اقولها :
- الضاهر انه من الرز والسحاوق يا امه .. قال الدكتور انك بتزيدي العفششة في السحاوق لوما المعدة اعتفشت معدتي واعتفش عندي القولون بسبب ويادة العفششة في السحاوق . وقالوا تكوني تفوري لي ثنتين عفاش مفور اشربهن كل يوم على الريق منسب اتباخر.
ايوه ، شاقول لامي الصدق وماعدشاخبي حالتي عليها ولا على أي مخلوق . وليش شاخبي وهو مرض . احيانا الانسان يتخاوش ويخبي على الدكاترة حالته الصحية خايف من الإبر . وانا افتجع من الإبر بصراحة ، حتى لو يطلع عندي عفششة في الدم والا في الدماغ حرام ما اضرب ولا ابره ، الا لو شروب سهل ، شزغف ابوه ومايقع شي ، أما ابر مستحيل .
اعرف واحد ماكانش يأكل سحاوق ابدا ولايقرب الرز ، و فجأة قالوا طلع عنده عفاشي بالحلق وماعد قدر حتى يتنفس وقرروا له ابر ، وهوذاك لليوم ساع الاعجم . تقوله كيف حالك يافلان ؟ يقولك : ياخي الابر تعبني لو به شروب انه احسن .
واعرف واحد ثاني يارحمتاه له جاله العفاشي بالمفاصل وهو يمشي في الشارع ، وقد عرضوا حالته على كم من دكتور ومافيش فايدة ، وكلما يسير بقعة يقولوا له ارتفعت عندك نسبة العفششة في العظام ولازم يودوه الخارج يتعالج ، وهوذاك مرجوم في بقعته لليوم ولاعد يقدر يحترك من كثر الإبر .
انا الان الحمد لله ، وضعي حلو ، هي شوية عفششة في المعدة ماهي شي .. يقع كل يوم قلص ماء مفور على الريق مع الالتزام بالعلاج على شوية حمية غذائية وشرجع ساع البمب . ويارحمتاه للذي بينهم عفششه في الجلد ، تختلس جلودهم زمابوه من يقول ربي الله.
قبل 2011 طبعا ماكانش هذا المرض منتشر مره في مجتمعنا ، لكن اللوثة الثورية اللي حصلت هاذيك الايام خزقت طبقة الأوزون وبعدى خزوقت بقية الطبقات والفئات قدامها طريق طريق حتى تحولت ، مع الوقت ، بسبب شلة "حيابهم حيا بهم" الى مرض معدي وخطير و مش أي دكتور يقدر يكتشفه او يشخصه بسهولة ، الا إذا كان " ديكتاتور باطني" محنك ساع هاضاك الطبيب الذي نبع لاداخلي واكتشف الحالة فيسع فيسع وقرر لي علاج قد لي اسبوع بين استعمله واحس ان حالتي الان اشكل والحمد لله .
( واما كيف وقعت عفاشي وقدرت اغالط الناس كل هم لليوم ، فهذه عادها قصة استخباراتية ظريفة جدا وشرجع اقولها لكم بعدما اكمل العلاج ان شاء الله )
