أيواااااه
الاحد 26 مايو 2019 - الساعة 04:45 صباحاً
كلهم يشتوا يحكمونا ويحكموا البلاد هذي بأي طريقة كانت، ولا واحد منهم عنده الجدارة.
الحوثيون جحبلونا بعدهم في حروب لا طائل منها وضمارهم في الحكم مش أكثر من شوية عفاطة على شوية بنادق على شوية ملازم على شوية زوامل وشوية مقابر، وتقولهم أين سايرين بنا ياجن البلاد خربت؟ يقولوا لك سابر ياضاك، ومشُم إحنا الذي بنخرب البلاد هو العدوان!
ايوااااه العدوان!
والإخوان المسلمون في حزب الإصلاح يخ والطباع الذي فيهم، كانوا يحكموا مع الرئيس الراحل "علي عبدالله صالح" واستفادوا منه كما لم يستفد الحزب الحاكم نفسه، ومدري كيف لوما اختلف عليهم المرقد وخرجوا هم ودراويشهم إلى الشوارع في 2011 للسيطرة على ثورة الشبان وأدخلونا مُعردسين، بسبب طمعهم وضيق رؤاهم، إلى جحر الحمار الداخلي. واليوم تقولهم يا إخوان يا مسلمين أنتم جزء أساسي في ما وصلت إليه البلاد من محن، يقولوا لك مااااشي مااااعه هو عفاش، هم الحوثيين.
ايوااااه هو عفاش، هم الحوثيين!
والحكومة الشرعية يا رحمتاااه لها، مرجومة في الرياض ساع الحانقة الذي سارت بيت أبوها وما فيش من يراجع بعدها، لا أب ولا أخوة ولا أخوال ولا أعموم، ولا هي قادرة تعترف بعجزها وفشلها، ولا هي قادرة ترجع بيت أبوها من نفسها وتقولها يا حانقة كم عتجلسي حانقة؟ تقولك: مشو أني السبب هو المد الفارسي في المنطقة وهم الحراك الجنوبي الذي ما خلاني أرجع البيت!
أيواااااه هو المد الفارسي هم الحراك الجنوبي!
والحراك الجنوبي شغلوا أرواحنا "دحابشة" و"شماليين" ويشتوا الانفصال والاستقلال واستعادة دولة الجنوب العربي. تقولهم طيب يا اخوتي انفصلوا ما دمتم قادرين تنفصلوا واعملوا ما اشتيتوا منو مانعكم؟ ومنو واقف حجر عثرة في طريقكم؟ يقولوا لك مابلا يخرج صاحب تعز من عدن ايش جاب عاره ينزح عندنا؟!
أيوااااه ايش جاب عاره صاحب تعز ينزح عندنا!
وصاحب تعز باشت يصيح في كل الميادين يشتي يحرر البلاد من الحوثة ويشتي يحرر فلسطين من إسرائيل، وتقوله ياخي أولا حرر تعز من "غزوان" الذي بينك وبينه شبرين، يقولك لاااا أول نحررها من أبو العباس! تقوله طيب حرروا تعز من الكل، من الحوثي ومن أبو العباس ومن غزوان ومن سالم، يقولوا لك، لااااا.. غزوان حالي وحبوب وسالم جيش وطني مُحطرم
ايوااااه سالم جيش وطني!
طيب يا خبره ما اختلفناش سالم جيش وطني على عيني وراسي، لكن ليش ما يخرج هو والقوة الذي معه يحرروا تعز المحاصرة؟ يقولوا لك لااااا سالم ما له دخل بهذي الهبالات، هذا على التحالف العربي.
أيوااااه على التحالف!
والتحالف العربي شكلوا الجيوش هنا وهناك لتحرير اليمن من المد الإيراني ودحر الحوثيين الانقلابيين وعودة الشرعية إلى صنعاء وتقولهم ماهو الخبر يا تحالف اليوم لنا خمس سنين نتطاحن في حرب مفتوحة ولا رجعت الشرعية من الرياض ولا تحررت اليمن من الانقلابيين؟ ولا استقر الحال في المناطق المحررة؟ يقولوا لك: أهم شيء حدودنا الإقليمية ومصالحنا في المنطقة. وانتوا أبو يمن ما دخلنا بكم، سدوا وإلا انزلوا ملح ليكن!
أيوااااه ننزل ملح لا بقي مننا واحد، وهم خسرانين شيء أصلاً؟!
طيب ياحوثيين ويا إخوان ويا شرعية ويا مجلس انتقالي، كل واحد منكم اليوم ماسك له شبرين من البلاد، يحكمها كيف ما يشتي، ولا واحد منكم قادر يعمل في محيطه ربع دولة ولا جنس منكم قادر يحسم المعركة لصالحه ولا با يقدر أبداً لو يصطب ربح، لأن كل واحد منكم في حقيقة الحال عامل نفسه غضنفر على أخوه! وكلكم في المحصلة العامة سقط بني سقط.
ايوااااه والله مع احترامي سقط بني سقط.
