مو اقلكم ، وقعت مطرة بتعز نعثت الدنيا نعث ، يمين ان عرف الكروش والامغااال والجلوود هذاك يضرب لدار النصر بجبل صبر ...
عرف الكداديف حصري و خاص بتعز الليلة خلطة سرية ما داري بها الا ارحم الراحمين !!
اذا كان المواطن من أساسه خارب ، يذبح و رجم بالكرش والجلود قفا بيته ، فلا تتأملوش انه شياطين الحكومة شجيؤا ينظفوا بعده ...
قد ما قدرناش نضبط حكومة تلف القمامة مقابل الرسوم اللي تأخذها مننا ، عادكم تشتوها تحرر لنا مدينة !!
و عادلك الحمشين حمران العيون حق هذي اليومين ، الاسود الضواري ، يمكنك تارق شكشحه ، تارق شندعسه ، يمين ما شلها تارق !!
سكهينا باااااس يا غيورة ، تارق هو من جيزكم يمشي بالريموت و لو هو باشت ما هرب بشرشف ..
اللي دمه حامي يقلب الطاولة على اسياده و يقلهم بااااس يا نياااك عاركم لمتى شنجلس محاصرين داخل تعز سعما الرباح وسط الحديقة ، يا دعمتم تعز مثل الجنوب و مأرب بالسلاح و الا ايرري بمه شرعية وتحالف ...
بس دجااااالين ، ما همش حق شي ...
اللي هي حنك قولوا لها انتي بس لفي القمامة من تحتيك و من شوارع تعز و اتركي الفِصاع فوق المساكين !!.
شوفوا كذا من الاخير ...
قادتنا و شرعيتنا و بهذه المرحلة كلهم عبارة عن احذية برجل ابو عقال ، متى ما تحرروا و عملوا لانفسهم كرامة بعدين افتحوا لقوفكم ..
لا تركوا مع بقري سلاحة ..
قعوا رجااال ، يكفي مرفالة وقعاي ..
تارق هذا لو اتفقوا التحالف انهم يكشحوه لتعز ، بايدخل بايدخل و هاذولا اللصوص اللي جالسين يحاربوا بعيال الناس اليوم، يكون بعلمكم هم اول ما بايبكعوله ارضاءً لابو عقال و يخلوه يدخل لأنهم عبيد و خايفين على مصالحهم و اللي سرقوه و جمعوه بالفترة الماضية ، و عارفين انه اللي شرفض شقع لعاره بالشمبل لوما يتخالفوا الجاعه ..
فلا تفصعينش زيادة ، نعرفكن من زمااان ...
خلولنا حالنا ، لا تضجوناش تارررق التررربة الشقق السرية ، و تدخلونا بعدها جحر الحمار الداخلي بحماقاتكم ، بو مشرووع يستهدف تعز اتكلمووووا و قعوا رجااال ، انتم تمثلوا الدولة ، اما الغمغمة والمزناوة و شغل الحكوال هذا اتركوه ..
اربعة مفصعين قتلة الواحد سع زوووبي جالسين يلعبوبكم سلبيت داخل تعز جمب بيوتكم و ما قدرتمش تضبطوهم و اليوم تقلدلي حكومة ضباطة ..
قد انتم لو فصعتم فوقنا نحن المساكين نتعامسكم ...
فلا تعملولكمش زحمة و الخط فاضي ، بكم جلسة و اثنين بيكات خمر صغار بين بن زايد و بن سلمان و يقرروا فين باترقدوا و فين باتخروا ،رعى الله ايام كنتم احرار ، انتم اليوم مجرد كنادم بالنسبة لهم ، وهم من يقرروا لحظة القذف بكم !!
تشتوا تثبتوا انكم رجال ، قعوا يد واحدة مثل اصحاب مأب و وقتها يمكن ينتبهوا لكم و انه في بشر بتعز !!
اما على هذا الحال ، يمين ما خرجنا لطريق و انتم بهذه العقليات ...
سامر وانا واحد من حق قُصاع حليان ، سمع صوت المطر افتز من النوم و قام يقلي ( قاكُنك غفوك ) ماناش داري مو قصده !!
تصبحوا على حرية ...