يا اصحاب تعز شغلتم المسؤلين .. عيب عليكم تحاربوهم بلقمة عيشهم .. الجماعة يشقوا على مرافقين وعلى صحفيين وعلى مفسبكين .. ودواوينهم عامرة بأصحاب الحاجات والمقالات والمظلوميات .. اللي يشتي وظيفة واللي يشتي ترقية واللي يشتي تحسين وضع واللي يشتي سفرية.

حيركم يا اصحاب تعز على اللي ياكل لقمته من عرق جبينكم .. استحوا وخلوا الخلق للخالق .


المسؤلين مافي اطيب منهم .. لو مشي بالطقم ممكن يصدمك من كثر ماهو محرج منك .. ولو جيت له المكتب ما يجزمش يقابلك ويجلس يتهرب منك من كثرة الحيا .. ولو معك مظلومية طرح لك ملف بالسكرتارية يأرشف الشكاوي والمظلوميات ويخبيها لك أمانة عنده لما تموت وبعدين يخرجها للورثة.

المسؤلين بالسلطة المحلية وبالجيش والأمن اكثر طبقة مطحونة باللوز والفستق والعسل البلدي والمرافقين اللي بعدهم ما اطيبهم مخلقين رغم الظروف اللي يمروا بها .. الواحد منهم لا يجد قوت يومك ويجلس يدور قوت يومك لما يلاقيه .. يخزنوا الحاصل حبتين ثلاث حتى ولو عود ماوية .. ما تطلعش قيمة الحبة حتى خمسة الف ريال .. يا الله والقات يكفيهم للفجر . وباكتين سجارة الباكت بألف ولا حول ولا قوة الا بالله .. مافيش معاهم غير النت بلاش دي اس ال ٤ ميجا على حساب القائد علشان يخفف عنهم الضجر .. ويواسيهم بالليل المظلم ويخليهم يفتحوا عيونهم لحماية الوطن ..الوطن اللي يحتاج (للكبار فقط).

واجيتم انتم يا اصحاب تعز بقيضكم وقضيضكم ولوحاتكم وصياحكم تقلقوا الآمنين .. ايش تشتوا منهم بالضبط .. قمامة واتنازلوا بها لكم خاصة بعد انتشار الكوليرا .. .. وايرادات والتزموا يستلموها رغم انه مش عملهم .. والوظائف قسموها بالعدالة ... والرقابة والمحاسبة جابوا لها اجازة مفتوحة .. .. وتحرير المدينة طول الليل وهم يصلوا ويدعوا انه الله يحررها .. والجبهات وقفوها عند حدها ... والسلاح مخزن بالحفظ والصون يخرجوه لأي تمرد داخلي ويحموا المدينة من أي مخالفين .. والمستشفيات استلموا ميزانياتها وقسموها بالتساوي بدون ما يظلموا احد .. واتحدى اي واحد يخرج حتى ابرة من المستشفى .. والأمن ثبتوه ولا يقدر يعمل حركة .. والمفصعين اتحدى واحد منهم يستريح .

عمل ..لا يمكن التهاون معهم ولازم يحللوا رواتبهم ... واصحاب العربيات يبكروا يصبحوا عليهم من الصبح ويشلوا منهم حق الصبوح . كنوع من خلق الألفة والمحبة .. واصحاب المطاعم يشلوا منهم على سلة القمامة باليوم الفين ريال بس يعني تخفيضات كبيرة .. وكل يوم يجي لهم واحد للمطعم مش نفسه حق اليوم الأوله علشان تجديد وما يملوش.


وضرائب القات عملوا لهم خطة علشان يحاربوا القات ويمنعوه بالتدريج يآخذوا على السيارة القات مبالغ احيان توصل على السيارة ٥٠٠ ألف وبالأعياد يضغطوا على المقاوته اكثر ويخلوهم يدفعوا على السيارة مليون .. ايش تشتوا اكثر من كذا .. ورغم هذا كله تشتوهم كمان يوردوها للبنك .. ويوردوها كلها؟؟ .. اتقوا الله يا اصحاب تعز قدهم يوردوا مليون باليوم بالعافية يجلسوا يعدوها نص نهار كم جهدهم ... هذا اضطهاااااد للسلطة المحلية وللعسكر حقنا .. !!

حتى المدينة قسموها مربعات ما يشتوش احد يكون مظلوم .. وقسموا الاسواق كل واحد معه سوق .. وقسموا المديريات كل واحد معه مديرية .. يوجه كيف ما يشتي ..

والتعليم مسكوا المدارس وحافظوا عليها ولا خلوا احد يدخل حتى الطلبة .. وبيوت الناس بأمان .. فتحوها وجلسوا فيها يحموها اتحدى واحد يآخذ منها شي او يسكن بها حتى صاحب البيت نفسه .. شوفوا على أمانة ومسؤلية .. والاحتفالات الوطنية يلبسوا لها احلا لبس ويخططوا لها احلا تخطيط ويوزعوا المهام بظروف .. وهيجة العبد يشتغلوها بمزاج بدون استعجال و حبة حبة.

حتى معاهم سجون سرية علشان يخففوا الضغط على الأمن وبنفس الوقت العمل اللي يكون بالسر يكون اجره اكبر ..
عمال النظافة خلوهم يشتغلوا بالصميل .. وعمروا فوقم الأوالي لأنه هذي نظافة وصحة الناس ما تصافطش ..
والاغاثات خزنوها عندهم .. وفتحوا مخازنهم لها واتحملوا اجور الحمالين .. ومشروع الماء بدل ما يجيبوه للناس يتبذرواويصبنوا البطانيات .. باعوه لهم بيع بالوايتات علشان ينموا عندهم الاحساس بالمسؤلية ويحسسوهم بالنعمة يعني شغل توعية ..

والقضايا الجنائية يحاولوا قدر الامكان يساعدوا المتورطين فيها لعل وعسا يهديهم الله .. ويتوبوا ويكون فيهم خير مستقبلاً

المهم .. انتم يا اصحاب تعز اضطريتوني للكلام عنهم وانا اتكلمت بجزء بسيط من افعالهم ومحاسنهم لهذي المدينة خزاهم الله خير .. وهم كانوا يشتوا يشتغلوا بدون كلام وبعيد عن الاضواء .. والرياء ...

بس مادام فيها تشكيك واتهامات فلازم يتكلموا ويدافعوا عن انفسهم ويشكلوا لجان للتحقيق في الفساد لأنهم عرفوا نواياكم يا اصحاب تعز وعرفوا انكم تشتوا تخربوا حياتهم واستقرارهم .. وتفاتنوا بينهم وتفككوا اواصر الاخوة والترابط والتراحم اللي يجمعهم ..
لكنهيهات

وحسبنا الله ونعم الوكيل ..

#من صفحة الكاتب بالفيسبوك