ايش عاد ناقص عليكم.. هل مقصرين معكم بشي والا شي لا سمح الله ؟!

الاحد 26 يونيو 2022 - الساعة 09:23 مساءً
المصدر : الرصيف برس - صنعاء

القاضي محمد البعداني

 

ايش عاد ناقص عليكم ، مستغرب ليش بترددوا بالجوامع حسبنا الله ونعم الوكيل يوميا قبل الفجر وبعده وبعد كل صلاة..

قلتم ندفع ضرائب دبل الدبل قلنا تفضلوا وقلنا للناس سلمو.

 

قلتم نجمرك مرتين قلنا مرحبا من العيون. ولا نخس.

 

قلتم زكاة وواجبات ورسوم ومجهود لكل صغيرة وكبيرة قلنا أبشروا مايغلى عليكم ولا قبلنا تظلم حد.

 

قلتم الخمس من ثروات البلاد لنا، قلنا تستاهلوا أكثر من الخمس. هذي شريعة

 

قلتم تبرعات للقدس ويوم الشهيد ويوم الغدير ويوم الولاية ويوم الصرخة وذكرى كربلاء وووووو قلنا يالبيك واجبنا .

 

قلتم مابش مرتبات المرتزقة والعدوان شلو علينا البنك قلنا وماله الرزاق الله ولا تزعلوا أنفسكم. على الطاوة نجزع.

 

قلتم الكهرباء مقطوعة قلنا ع ندبر أنفسنا لا تشيلو همّ . 

 

قلتم مابش ديزل وبترول العدوان محتجز السفن وباعوا لنا سوق سوداء قلنا سوق سوداء سوق صفراء مستعدين نشتري الدبة حتى بعشرين الف وهذا ماتم فعلا.

 

قلتم الغاز معدوم قلنا ولا تقلقوا ع نشتري من اسواق الغاز السوداء أو ع نرجع نحطب ما انطبقت الدنيا فداكم الغاز.

 

قلتم نعتذر عن عدم صرف نصف الراتب قلنا يالوماه الله المستعان مابش داعي للإعتذار أحنا مقدرين تعبكم وجهادكم ونعتذر لكم عن تعبكم وأنتوا تفكروا كيف تعتذروا لنا !!.

 

ولا تزيدوا تسمعوا لنا نخس يكفينا الإعتذار ويكفيكم شرف المدافعة والمحاولة.

 

قلتم نريد تفعيل مبدأ أنصف الناس من نفسك ومحاكمة القضاة والموظفين ..

 

 قلنا ماهذا قدو جور كم جهدكم مافيكم سخى تحاكموا انفسكم على عدم صرف الراتب او على حالتنا المزرية كم وكم !!! الا اذا قصدكم ثاني !!.

 

المهم صدقوني ماكتبت هذا الكلام ألا ونيتي طيبة من أجل أعرف سبب (حسبكم الله ونعم الوكيل ) لأنه إحنا ايش عاد نقول بعد (حسبتكم) عاد شي عندنا تقصير كل يوم أسمعها وأشعر بالذنب وأتألم ثم أسأل نفسي وأقول مدري او عاد أحنا مقصرين معاكم بشيء او ظالمين لكم بشيء سبحان الله او يمكن بنفسكم حاجة ومستحيين تتكلموا أو.. او... ومن كثر ما أخذت وأعطيت مع نفسي قررت أنقل أليكم السؤال ذاته .. 

هل أحنا مقصرين بشي ولا شي لا سمح الله ؟.

 

ها واعذرونا أنشغلنا بالعمل كما امرتمونا أما الأمور الخاصة يمين ماعد فكرنا فيها غير نفكر فيكم وكيف ننتصر وتنتهي الحرب من خلالكم ...وسلامتكم

عباس الهردي

2022-June-27

المقال المنسوب للقاضي البعداني مقالي ونشرتة في سبتمبر ٢٠٢١ ارجوا الرد وتعديل المقال


جميع الحقوق محفوظة لدى موقع الرصيف برس