بيان مجموعة بيت هائل .. بيان ممتاز ومنطقي ولا عليه غبار.. بس لو كان صادر من مستورد صغير او جديد بالسوق، مش من بيت هائل اللي يملكوا واحد من اهم وأكبر البنوك التجارية في اليمن.

يعني انهم عارفين وداريين من قبل شهور بما حصل اليوم لأسعار الصرف وان الموضوع وراء موقف دولي وغربي (امريكي بريطاني) بالتحديد تسبب بانقلاب تام في السوق المصرفي في اليمن انتقلت فيه السيطرة والتحكم من صنعاء الى عدن.

وان الادوات التي ضبط بها الحوثي الصرف لـ 7 سنين وخضعت لها مجموعة بيت هائل اصبحت اليوم بيد المعبقي في عدن

الا اذا كان الموضوع تمرد وزنبلة مع "السيد"

هذا شيء ثاني.

ورداً على ما يطرحه بيت هائل وعلى كل المستوردين الرافضين الان خفض الأسعار ، بذريعة انهم يريدوا من البنك الان يضمن لهم دولار بسعر السوق الحالي.

انا قبل يومين كتبت منشور منصف لكم وانه من حقكم تنتظروا وتطمنوا لما تتفعل لجنة الاستيراد 

لكن بصراحة كثرتوا بها مرة ، وطلعت لكم قرون فوقنا وفوق الشرعية والبنك، لانهم مساكين ما معاهم صميل زي الحوثي يبطش بكم.

يعني على من تضحكوا ؟ تتعاملوا مع الشعب بأنه قطيع من المغفلين والسذج اللي ما يفهموا شي ؟!!.

تتعاملوا معانا وكأننا بلا ذاكرة؟ وكأننا نسينا موضوع المزادات اللي كان يعرضها البنك المركزي من 2022؟.

لمن كان يعرضها؟ مش للبنوك التجارية اللي يفترض انها هي من تغطي استيرادكم من الخارج؟.

هذه بيانات البنك المركزي ، من نوفمبر 2022م وحتى ابريل 2025م عرض البنك مزادات بـ 3.5 مليار دولار ، حجم الطلب كان 2,3 مليار فقط ، يعني 66% بس نسبة تغطية هذه المزادات رغم ان البنك كان يعرض الدولار بأقل من سعر السوق.

ونشوف اخر مزاد للبنك في تاريخ 8 يوليو يعني قبل أقل من شهر ، عرض البنك 30 مليون دولار والطلب 17 مليون فقط يعني 57% بس من قيمة المزاد رغم سعر المزاد يومها كان 2707 ريال وسعره بالسوق في نفس اليوم كان 2784 ريال اما يوم تسوية المزاد كان الدولار وصل الى 2826 ريال ، يعني الفارق وصل الى 119 ريال.

تخيلوا البنك يعرض عليه دولار بأقل من سعر السوق بـ 119 ريال، وعادهم يدلعوا !!.

3 سنين تقريباً والحال على كذا ، واليوم يجي لك بيت هائل وغيرهم من التجار الفجار يفتح لقفه على البنك ويتشرط دولار بسعر السوق.. والبنك له 3 سنين يعرض عليهم دولار باقل من السوق مش الا بسعر السوق

امانة إنهم بلا حياء ولا خجل..